Saturday, February 17, 2018

رەمزی بەرەوپێشبردنی راپەڕين بۆ لەناوبردنی رژێمی ولايەتی فەقيهی


رەمزی بەرەوپێشبردنی راپەڕين بۆ لەناوبردنی رژێمی ولايەتی فەقيهی
وريايی بەرانبەر بە ديكتاتۆر، سووربوون لەسەر ئامانجی سەرەكيی راپەڕين
عەبدولڕەحمان مەهابادی، نووسەر و لێكۆڵەری سياسی
دوای ئەوەی راپەڕينی گەل يەكەم هەنگاوی خۆی خستە پشت سەر و بە نيازە هەنگاويتر هەڵبگرێت، رژێمی ئێران و دەست و پێوەندەكانی و لۆبی ئەم رژێمە لە دەرەوەی ئێران كەوتوونەتە خۆ تا هەرچوونێك بكرێ بەر بە پەرەسەندنی راپەڕينەکە بگرن.
سەرەتا وا بەرچاو دەكەوێت كە رژێمی ديكتاتۆريی دەسەڵاتدار لە ئێران بۆ گرتنەوەی باردۆخەكە و سەركوتكردنی راپەڕين، زۆرێك پلان و سيناريۆی لەبەر دەستدايە كە بە شێوازی جياجيا دەتوانێ كاری بۆ بكات و دەزگاكانی راگەياندنی خۆی وەگەڕ بخات بۆ ئەم مەبەستە. دەستی بەمكارەش كردووە و رۆژ نيە كاری بۆ نەکات و تەنانەت ئيمدادگەرانی غەيبی (واتا غەربی ) بە هانايەوە نەچن!
كڕۆكی هەنگاونانی رژێم بۆ دەربازبوون لە رووخان لە هەر دوو ئاستی ناوخۆيی و دەرەوەدا يەكسانە. لە هەر دوو دیوی سنوورەکان بە تەواوی لە رووخانيان لەسەر دەستی خەڵك و موقاومەتی ئێران بە تەواوی تۆقاون. چون ئەم راپەڕينەی لە دوا رۆژانی ساڵی 2017ەوە دەستی پێكردووە زۆر جياوازە لە راپەڕينەكانی پێشوو. كاربەدەستانی رژێم خۆيشيان دان بەوەدا دەنێن. (سەعيد حيجاريان) كە خۆی يەكێك بووە لە دامەزرێنەرانی وەزارەتی ئيتڵاعاتی رژێم لە وتارێكدا لە رۆژنامەی حكومەتيی ”ئيعتيماد” دانی بەوە دا ناوە كە راپەڕينەكەی ئەمدواييە بەسەر روحانی و تەواوەتی رژێمی دا تێپەڕ بوو. واته راپەڕينەکە بە وتەی ناوبراو ”هەروەك شەپۆلی زريا، دەكشێتەوە و بە تەوژمێكی بەهێزترەوە دەگەڕێتەوە”.

رژێمی ديكتاتۆريی ئێران بە پێی تايبەتمەنديیە ئايينيیەکەی خۆی دەتوانێ هەزار و يەك مۆدێل پيلان و سيناريۆی لە باغەڵدا بێ كە رەنگە هەندێكيشيان بريقەدار و بە رواڵەت جوان و دڵڕفێن بن و هەندێكيشيان ئاوێتەی هێز و قودرەت بێ. بەڵام هەر هەموويان بۆشن و بێ ناوەرۆك و، لە رووی بێهێزی و داماويی و فريوكارييەوەيە، كە خەڵك و راپەڕينكارانی بوێر دەتوانن زۆر بە ئاسانی پووچەڵيان بكەنەوە. لەم پێوەندييەدا، كليل و رەمز و وشەی رزگاريدەر، هەمان "سووبوونە لەسەر رووخاندنی رژێم" كە هەرگيز نابێت لێی دوور بكەونەوە. چون دەكرێت بە سوور بوون لەسەر ئەم داواكارييە رەوا و بنەڕەتييە، هەموو مەكر و حيلە و پيلانەكانی رژێم و هاوپەيمانانی و دەست و پێوەندەكانی بدەنەوە بەسەر خۆياندا!/
ئەوان رەنگە بڵێن بەردەواميدان بە راپەڕين ، ئێران بەرەو سوريايەكيتر دەبات، يا لەوانەيە بڵێن راپەڕین ئێران بەرەو دابەشکردن دەبات. رەنگە بڵێن ئێران دەبێتە نيچير بۆ روژئاوا يا رۆژهەڵات يا دەبێتە ژێردەست و ئەسيری خەڵكانی بێ خودا و كافر و مونافق و لەخودا بێ خەبەر. رەنگە بڵێن ئێران بەرەوە دواوە دەباتەوە و "ئايندە" دەروازەی خۆی بە رووی ئێران و ئێرانييەكاندا دادەخات. ئەوان لەوانەيە بڵێن خەڵك هەژارتر دەبن و رۆڵەكانيان تووشی رۆژە رەشی دەبنەوە و ....هتد. بەڵام ئێمە نابێ ئەوە لە ياد بكەين كە ئەوانە و زۆرێكيتريش، تەنها بەشێكن لە هەمان سيناريۆ و پيلانەكانی رژێمی ديكتاتۆری ئێران به مەبەستی مانەوەی لە دەسەڵاتدا. رەمزی تێپەڕبوون، هەمان بەردەوامی دان بە راپەڕين و سووربوون لەسەر ئامانجی سەرەكی واتا رووخاندنی ديكتاتۆرييەتی دەسەڵاتدارە.
ئەوان دەيانەوێت لە بڕی كوشتاری راپەڕينكاران لە سەر شەقامەكان، بيانگرن و لە ناو زيندانەكاندا بێ و سەر و شوێنيان بكەن. هەروەك چۆن تا ئێستا ژمارێكی بەرچاو لە گيراوەكانيان لە ناو زيندان شەهيد كردووە. ئەوان بۆ ئەم كارە يەكەی ”ليباس شەخسی”يان درووست كردووە تا بچنە ناو ريزی راپەڕينكاران و شوناساييان بكەن و بيانكەن بە نيچير و بيانگرن و بياكوژن. ئەوان دەيانەوێت خەڵك بە سەر دوو بەشی ئابووری (واتا ئەوانەی خوازياری چارەسەری باری ژيانيانن) و سياسی (واتا ئەوانەی خوازياری رووخاندنی رژێمی مەلاكان دەكەن) دابەش بكەن تا بەمجۆرە سەرەتا سياسييەكان و دواتريش ئابوورييەكان لە ناو بەرن. لە كاتێكدا ئەم دوانە هەرگيز لێك جياناكرێنەوە. ئەوان دەيانەوێت خەڵك و بە تايبەت لاوانی بوێری ئێران نائومێد بكەن و لە شەکەتیان بکەن. ئەوان بەر له هەر شتێك لەوە تۆقاون كە راپەڕينی گەل خاوەنی رێكخستن و پێكهاتە و رێبەرايەتی خۆيەتی. لە كاتێكدا وەلی فەقيهی ئاخوندان، هەروەك سەركۆماری داماوی مەلاكان، خوازراو يا نەخوازراو، لێرە و لەوێ، هەر لە سەرەتاوە ئادرێسی راستەقينەی رێبەرايەتيی راپەڕينیان بە هەمووان نيشان دا. خامنەئی لە وتارەكەی خۆيدا وتی كە موجاهيدينی خەلق لە چەند مانگ پێش راپەڕينەوە بەرنامەيان بۆ داڕشتبوو. روحانيش لە پێۆەندييەكی تەلەفونيدا دەستەوداوێنی سەركۆماری فەرانسە بوو كە رێگری بكات لە موقاومەتی ئێران و موجاهيدينی خەلق، تا رێبەرايەتی راپەڕينەكە نەكەن.
ئەوەش له یاد نەكەين كە ديكتاتۆريی ئايينی هاوكات كە دزێوترين جۆری ديكتاتۆرييەتە لە مێژوودا، مەكر و پيلانەكانيش لە ديكتاتۆرانی پێش خۆی زۆر زياترە. دەست و پێوەندەكانی ئەم ديكتاتۆرييە لە هەموو جل و بەرگێكدا و بە هەموو دەمامكێكەوە خۆيان دەردەخەن. بە جل و بەرگی ئايينی ياخود لائيك و عيلمانی، يان رەنگە بە جل و بەرگی چەپ دەرکەون ياخود ماركسی و شيوعی. رەنگە ديكتاتۆرييەتی ئايينی لە دوا رۆژانی خۆيدا بۆ بڵاوەپێكردنی ريزەكانی شۆڕش يا لێكترازانی ئوپۆزيسيۆنی رووخێنەر، سەر لە نوێ باسی گفت و گۆ بێنێتە ئاڕاوە ياخود ئيمتيازگەلێك بە لايەنی گفتوگۆكەر بدات تا بەم جۆرە چەند رۆژێك بخاتە سەر تەمەنی خۆی و رووخان لە خۆی دوور بخاتەوە!
بەڵام لەبەرانبەر ئەم سيناريۆ و پيلانە گڵاوانەی رژێمی ديكتاتۆريی دەسەڵاتدار لە ئێران، راستييەكی حاشاهەڵنەگر هەيە و ئەويش ئەوەيە كە مێژووی ئێران هەرگيز بۆ رۆژانی بەر لە راپەڕين ناگەڕێتەوە دواوە و ئەم رژێمە بە خێرايی رادەماڵدرێت. هەل و مەرجی عەينی و زەينی بو ئەم كارە ئامادەيە و ئالترناتيڤی ديموكراتی لەبەردەستە.
باری نالەباری ژيان و ئابووريی وڵات، ناڕەوابوونی رژێمی مەلاكان و رەوايەتی ستراتيژيی رووخاندنی ئەم رژێمە لە سەر دەستی خەڵك و موقاومەتی ئێران، پێویستی بە هاوكاریکردنی هەموو لايەكە. لە حاڵی حازردا ژمارەی بە پێچەوانە (شمارش معکوس)ی رژێمی ديكتاتۆريی ئايينی لە ئێران دەستی پێكردووە و ئەركی سەرشانی هەر تاك و رەوتێكی ئازاديخوازە بۆ ئەم كارە راپەڕێت و لەسەر دەوڵەتانی دوور و نزيكیشە رێز بگرن لە راپەڕينی گەل و موقاومەتی ئێران بەرەسمی بناسن. ئەمەش تاقيكردنەوەيەكی مێژووییە لە بەردەم هەمووان.


No comments:

Post a Comment