ساڵی 2018.. ساڵێكی چارەنووسساز بۆ ناوچەكە!

ساڵی 2018.. ساڵێكی چارەنووسساز بۆ ناوچەكە!

ئايا رژێمی ئێران تەمەنی (40)ساڵەی خۆی تەواو دەكات؟

عەبدولڕەحمان مەهابادی *

لە كۆتايی ساڵی  2017 دا و لە گەرماوگەرمی ئەو رووداو و گۆڕانكارييانەی روو لە زيادبوونە، ئەبينين شەپۆلێكی نوێ لە ترس و دڵەڕاوكە، رژێمی مەلاكانی دەسەڵاتدار لە ئێرانی گرتۆتەوە. لە كێ تۆقيون و لەبەرچی تۆقیون و ئايا ئەم تۆقینەی رژێم شتێكی رووتين و هەميشەييە؟!

لەمدواييانەدا پەرچەكردارەكانی رژێمی ئێران بەرانبەر بە جم و جوڵ و چالاكييەكانی موقاومەتی ئێران زۆر سەير دێتە بەرچاو و جياوازە لە رابردوو. چون بەر لە هەمووان، كاربەدەستانی ئەم رژێمە خۆيان باش دەزانن لە ناوچوونی رژێمەكەيان تەنها و تەنها لەسەر دەستی خەڵك و موقاومەتی ئێران مەيسەر دەبێت و ئێستاش زۆر نزيك بووەتەوە!

بە درێژايی دەسەڵاتی مەلاكان و بە تايبەت لە ماوەی بيست ساڵی رابردوو، لە زۆرێك ئاستی سياسی و ديپلۆماتی، هەروەها لە ناوخۆی ئێران دا، موقاومەتی ئێران زۆر جار بانگەشەی كردووە و داوای لە كۆمەڵگای نێودەوڵەتی و بە تايبەت وڵاتانی زلهێزی جيهان كردووە هەڵۆێستێكی توند و بڕەڕ بگرنە بەر بەرانبەر بە رژێمی ئێران. واتا هەڵوێستێك كە گۆڕينی رژێمی ئێرانی لە ناخ دا بێت. بەڵام بە هۆی سياسەتی موداراكردن و سازشتكردنی رۆژئاوا، بانگەشەكردنەكان بێ وڵام مانەوە و بە باشترين ديوەكەيدا، لە شەرمەزاركردنی ئەم رژێمە تێنەدەپەڕی و بە ديوە نيگاتيڤيەكەيشيدا، موقاومەتی ئێرانيان بە بێ بنەما خستە ناو ليستی تيرۆرە و بەمجۆرە بەستيانەوە و رێگەيان بۆ رژێمی ئێران خۆش كرد كە بە ئارەزووی خۆی بەردەوام بێت لە پێشێلكردنی مافەكانی مرۆڤ لە ناوخۆی ئێران و فرەخوازی و هەناردەكردنی تيرۆر و توندڕۆيی بۆ دەرەوەی سنوورەكانی ئێران. هەر ئەو ستراتيژی و سياسەتانەی هەركامەيان، سوودێكی زۆريان بە لێشاو گەياندە رژێمی ئێران و دەرەنجام، تەمەنی ئەم ”حكومەتە هەرە گەورەی پشتيوانی تيرۆر لە جيهان”یان درێژكردەوە بۆ ئەمڕۆ!

بە واتايەكيتر، سەرباری بانگەشە و چالاكييەكانی موقاومەتی ئێران بۆ ئاشكراكردنی پرۆژەكانی رژێمی ئێران، بەڵام هێشتا دۆسێيەی مافەكانی مرۆڤ لە ئێرانی ژێر دەسەڵاتی و بە تايبەت دوسێيەی قەتڵوعامكردنی (30) هەزار زيندانيی سياسی لە ساڵی 1988 بە نەكراوەيی ماوەتەوە و دەستگيركردن و ئەشكەنجە و لە سێدارەدار هەروا بەردەوامە و روو لە زيادبوونە.

ئابووريی ئێران بە دەست ژمارێك لە سەران و بە تايبەت فەرماندەران و داو و دەزگا سەركوتكەرەكانی سوپای پاسداراندا تاپۆ كراوە و خەڵكی ئێران لە دۆخێكی زۆر خراپدا ئەژين. بە پێی ميديای حكومی زياتر لە سەدا سی (30%)ی ئێرانی 85 مليۆنی لە ژێر هێڵی نەداری دان. بارودۆخی خەڵكی ئەو ناوچانەی كەوتنە بەر شەپۆلی بوومەلەرزە و هەروەها ناڕەزايەتی دەربڕينی خەڵك بەرانبەر بە حكومەت لە تاران و پارێزگاكانيتری ئێران باشترين بەڵگەی زيندووی ئەم راستييانەن.

هێشتا رێككەوتننامەی ئەتۆمی رژێم و دەوڵەتانی رۆژئاوا لە سەر مێزە و بە هۆی رێككەوتننامەكە بە مليارد دۆڵار درايەوە بەو رژێمە سەركوتكەرە و ئەوانيش لە بڕی خەرجكردنی بۆ خەڵكی ئێران، تەرخانيان كرد بۆ هەناردەكردنی تيرۆر و توندڕۆيی بۆ عێراق و سوريا و حيزبوڵڵای لوبنان و حوسيەكان لە يەمەن.

هێشتا دەستتێۆەردان و تاوان و خوێنڕشتنەكانی رژێمی ئێران لە وڵاتانی ناوچەكە بەردەوامە و دەست و پەنجەی ئەم رژێمە لە ناوچەكە كورت نەكراوەتەوە و ئەوەيش بووەتە هۆی كوژرانی سەدان هەزار كەس لە خەڵكی ناوچەكە و سياسەتی بێ كردەيی رۆژئاوا، ئەم رژێمەی هانداوە بۆ بەردەوامبوونی لە كوشتاری خەڵك و پێشێلكردنی زياتری رێككەوتننامەكان.

و...هتد

بەڵام لەم قوناخەدا كە ساڵێك بەر لە ئێستا دەستی پێكردوە، هاوكات لەگەڵ گەشەسەندنی چالاكييەكانی هێزەكانی موقاومەتی ئێران و ناڕەزايەتيە جەماوەرييەكان دژ بە دەسەڵاتداران لە شارەكانی ئێران، شەپۆلێكی نوێ و بێ هاوتای هەڵوێست و زەبروەشاندنی بەردەوام بەرچاو دەكەوێت كە هەم لە لايەن حكومەتی ئەمريكا، هەم لە لايەن كۆنگرێس و مەجليسی سيناتی ئەو وڵاتە، هەم لە لايەن يەكێتی ئەورووپا و پەرلەمانی ئەورووپا، هەميش لە لايەن رێكخراوی نەتەوە يەكگرتووەكان و دەوڵەتانی عەرەبی، يەك بە دوای يەك، رژێمی ئێران و سياسەتەكانی كردووەتە ئامانج.

جياوازەی ئەو تۆقاوييەی رژێمی ئێران لە رابردوو جيا دەكاتەوە هەلقوڵاوی ئەم راستيەيە كە لەم چەند مانگەی رابردوودا، گوێ بۆ بانگەشەكانی موقاومەتی ماندوويي‌نەناسی و شوێندانەری ئێران شل كراوە و كۆمەڵگای نێودەوڵەتی هەنگاوی ناوەتە ئەو رێگايەی موقاومەتی ئێران ساڵانی رابردوو بانگەشەی بۆ كردبوو. هەر ئەوەشە هۆی ئەو ترسەی وای كردووە رژێمی ويلايەتی فەقيهی مەلاكان بە تەواوی بتۆقێن.

ئێستا كە موقاومەتی ئێران، تۆخمەتر و بەهێزتر لە جاران خۆی بۆ رووخاندنی ئەم رژێمە ئامادە دەكات، كۆدەنگێكی نێودەوڵەتی و بەهێز دەركەوتووە كە تاكە رێگا بۆ كۆتايی هێنان بە قەيرانەكان لە ناوچەی رۆژهەڵاتی ناوەڕاست، گۆڕينی رژێمی ئێرانە. ئەوەش هەر ئەو سياسەت و ستراتيژييە راست و دروستەيە كە موقاومەتی ئێران هەر لە سەرەتاوە بانگەشەش بۆ دابوو و بە پشت بەستن بە خۆی و گەلەكەی لەسەری سوور بون و ئامادە نەبوون دەستی لێ هەڵگرن.

سەرانی رژێمی مەلاكان زۆر جار خۆيان دانيان بەوەدا ناوە كە مەترسی و هەرەشەی يەكەم و هەرە سەرەكی بۆ سەر حكومەتەكەيان، موقاومەتی ئێرانە. لەم روانگەوەيە كە بەردەوام ئامانجی سەرەكی بۆ كوشتار و لەنابردن، هێزەكانی موقاومەتی ئێران بووە بۆ رژێمی ئێران. ئەو موقاومەتەی تا ئێستا زياتر لە (120)هەزار شەهيدی لە پێناو روخاندنی ئەم رژێمە داوە كە قەتڵوعامكردنی (30)هەزار زيندانيی سياسی لە ساڵی 1988 بەشێكە لەو قوربانيە.

بۆ هەمووان روون و ئاشكراشە كە كۆمەڵگای نێودەوڵەتی لە بواری پروژە ئەتۆمی و ناوەكی رژێكی ئێران قەرزداری موقاومەتی ئێرانە. چون بە دان پێدانانی گەورە بەرپرسانی ئەمريكا، بۆ يەكەم جار موقاومەتی ئێران بوو كە كۆمەڵگای نێودەوڵەتيی لەم پرۆژە مەترسيدارە ئآگادار كردەوە و دواتريش بەردەوام زانيارييەكانی تايبەت بەۆ پرۆژەيەی خستە بەردەم ميدياكانی جيهان.

لە بواری فرەخوازی و تيرۆريزم و دەستتێوەردانەكانی رژێمی ئێران لە كاروباری وڵاتان، هەر ئەو موقاومەتە بوو كە هەروەك بەربەستێكی پۆڵايين بەرەنگاری سياسەتەكانی ئەم رژێمە بووەوە و جيهانی لە مەبەستە شووم و دژە مرۆييەكانی رژێمی مەلاكان ئاگادار كردەوە. ئێستا كۆمەڵگای نێودەوڵەتی بەو دەرك و تێگەشتنە راست و دروستە گەيشتووە كە فاشيزمی ئايينی دەسەڵاتدار لە ئێران، ژێدەر و سەرچاوەی تيرۆر و بانكەوانی سەرەكی تيرۆريزم و پشتيوانی هەرە گەورەی تيرۆرە لە جيهاندا.

ئێستا لە كاتێكدا ساڵی نوێی زايينی دەست پێدەكەين كە رژێمی ئێران بەر لە هەمووان لە مەسجی ئەم قۆناغە گەيشتووە و دەرنگە بەڵام دوور نيە ئەو رۆژەی چارەنووس لە ئێران بە سوودی گەل و موقاومەتی ئێران هەڵگەڕێتەوە و دوای نزيك بە چوار دەيە، دەسەڵات بگەڕێتەوە بۆ گەل و لە بەر رۆشنايی ئەم گۆڕانكارييە گەورەشدا، ئاشتی و ئاسايش، كە تا ئێستا لە لايەن رژێمی ئێرانەوە بە بارمتە گيرابوو، بگەڕێتەوە بۆ ناوچەكە و هەروەها كۆمەڵگای نێودەوڵەتی.

 *نووسەر و شرۆڤەكاری سياسی، پسپۆڕ لە كاروباری ئێران