راپەڕينی جەماوەری وەك بوومەلەرزەی سياسی لە ئێران

راپەڕينی جەماوەری وەك بوومەلەرزەی سياسی لە ئێران

عەبدولڕەحمان مەهابادی ، نووسەر و لێكۆڵەری سياسی

يەكەم هەنگاوی راپەڕينە جەماوەرييەكەی ئەم دواييە بە جۆرێك رژێمی مەلاكانی شپرزە كرد كە كاتێ سەيری رەهەندەكانی راپەڕین دەكەين ئەبينين ئەو راپەڕينە لە يەكەم هەنگاوی خۆيدا تا چ رادەيەك ئەم رژێمەی تۆقاندووە.

عەلی خامنەئی، رێبەری مەلا دەسەڵاتدارەكانی ئێران دوای ئەوەی رۆژی 12ی بەفرانبار بە پەشۆكاوی دەركەوت و تەنها ئەوەی وەت كە ”قسەگەلێكم هەيە كە دواتر دەيكەم”، هەفتەيەكی نەخاياند كە هات و قسەكانی كرد كه كڕۆكی قسەكانيشی ئەوە بوو، هەروەك حەمەڕەزاشا كە لە گەرماوگەرمی راپەڕينەكەی ساڵی 1979 وتی ”پەيامی شۆڕشەكەتانم پێگەيشت”، روو لە خەڵكی وەزاڵەهاتووی ئێران وتی: " لە پەيامی راپەڕينەكەتان گەيشتم"(هەڵبەت بە زمانی فريودەرانەی ئاخوندی). بەڵام ئەوەی نەوت شا كه ئەو قسەيەی کرد زۆری نەبرد رووخا و پاش ماوەيەكی كورت، ديقی كرد و سەری نايەوە.

خامنەی لە وتارەكەيدا دانی بەوەدا نا كە موجاهيدينی خەلق لە پشت راپەڕينەكەوە بوون و تەنانەت ئەوەيشی وت كە لە چەند مانگ لەمەوبەرەوه ئامادەكارييان بۆ كردووه و بەمجۆرە بە نابەدڵی يەكێك لە سيناريۆكانی رژێمەی تەواو سوتاند كە لە دەرەوەی ئێران ئیدیعای ئەوەيان دەكرد موجاهيدين لە ناوخۆی ئێران خاوەنی جەماوەر و پێگەی كۆمەڵايەتی نين!

وتارەكەی خامنەئی ئەوەشی هێنايەوە ياد كە ساڵانی رابردوو، كاتێ ئەندامانی موجاهيدينی خەلق لە گەمارۆی هێزە دڕندەكانی نوری ماليكيدا بوون لە عێراق و مەحمود ئەحمەدی نەژادی سەركۆماری مەلاكان، ئەوکات سەردانی بەغدای كردبوو لە وڵامی پرسياری يەكێك لە رۆژنامەنووساندا وتبووی ”مەگەر هيچ لە موجاهيدين ماوتەوە!”. لەوە گەڕێين كە كام لەم دووانە راست بن بۆ قسەكانی ئەحمەدي‌نژاد كە آيا، ويستبووی وا نيشان بدات كە موجاهيدين چيتر لە ناو ئێران و هاوكێشە سياسيەكاندا كاريگەرييان نەماوە ياخود، وتەكەی ناوبراو ئاماژە بوو بۆ ”سيناريۆی قەتڵوعامكردنی موجاهيدين" كە لە بەرنامەياندا بوو رێگە نەدەن تەنانەت يەكێكيان بە سەلامەتی لە عێراق دەربچن و هەر هەموويان كوشتار بكەن”. بەڵام بە هەر حاڵ ئێستا جيهان و بەر لە هەمووان، خەڵكی ئێران ئەبينن كە موجاهيدين نەك تەنها ماون بەڵكو بە گواستنەوەی سەركەوتوانەيان لە عێراقەوە بەرەو ئەورووپا، وانەيەكی وەهايان بۆ رژێمی ئێران وتەوە كە راپەڕينەكەی ئەمجارەی ئێران، تەنها دەستپێكی هەنگاوگەلێكيترن کە بە خێرايی بەرەو رووخانی رژێمی ئێران مل ناوە.

خامنەئی لە وتارەكەيدا هەوڵی دا بە شێوازی خومەينی جياوازی بخاتە نێوان ريزەكانی راپەڕين و هۆكاری رژانە سەر شەقامی بەشێك لە شەپۆلە مەزنەكەی جەماوەری ناو راپەڕين بە ”داخوازيی ئابووری” ببەستێتەوە و بەشەكەيتريشی بە موجاهيدينی خەلق. هاوكات جورئەتی ئەوەی نەكرد ئاماژە بدات بە پێناسەی ئەو 50 شەهيد و (10)هەزار دەستبەسەر كراوەی راپەڕين. چون ئەگەر ئەمكارەی بكردبايە، بەر لە هەر شتێكيتر، پەيوەنديی پتەوی نێوان خەڵك و موقاومەتی ئێران دەردەكەوت و ئەوەش دەبووە هۆی هەڵوەرينی خێراتری هێزە دۆڕاوەكانی. سەرانی ئەم رژێمە بەردەوام لە هەوڵی ئەوەدا بوون بە ئێستاشەوە كە ئامار و ئەژماری گيراوەكان كاڵ بكەنەوە تا هەم بەر بە كاريگەريی خوێنی شەهيدانی سەربەرزی راپەڕين بەسەر جەماوەردا بگرێت و هەميش بە شێوازی جياجيا گيراوەكان بێ سەر و شوێن بكەن. هەروەك چۆن تا ئێستا ژمارێك لە گيراوەكان لە ناو زيندانە ترسناكەكانی حكومەت دا شەهيد كراون.

يەكێكيتر لە دەرهاويشتەكانی راپەڕين ئەوە بوو كە شەڕە گورگی ناو دەسەڵاتی توندتر كرد. شاشخاپێن روحانی بەرانبەر بە باڵی بەرانبەر كە سياسەتی ئابووری حكومەتی روحانیی بە هۆكاری تەقينەوە و راپەڕين ناساندبوو وتی: ”هەندێك وا ئەزانن خەڵك تەنها داوای ئابووری دەكەن. واتا ئەگەر ئێستا بە رادەی پێويست پارە به خەڵك بدەين ئايا كێشەكە چارەسەر دەكرێت و خەڵك داوای شتێكيتر ناكەن؟!... ئەگەر بە خەڵك بڵێين ئێستا پارەتان پێ دەدەين و مافی قسەكردنتان بۆ نيە كێشەكە تەواو دەبێت؟ مەگەر دەكرێت ئازادی و ژيانی خەڵك بە پارە بكڕدرێت؟ چەواشەكاری لە پای چی و لەبەر چی سوكايەتی بە خەڵك دەكەن؟ لەبەرچی وا نيشان دەدەن كە هۆی هاوار و ناڕەزايەتيەكانی خەڵك باری خراپی ئابوورييە؟”.

لە راستيدا وتە و هەڵوێستی هەر دوو باڵی رژێم يەك شتە لە ناوەرۆكدا و دەيانەوێت ريزەكانی خەڵك تێك بدەن و دواتر سەركوتيان بكەن. لەبەر ئەوەی ئێستا گەلانی جيهان بە چاوی خۆيان ئەبينن كە لەم راپەڕينەدا، خەڵك بە درووشمی ”ئيسڵاح تەڵەب ئوسولگەرا، ئيتر كۆتايی هات ماجەرا” رووخاندنی تەواوەتی رژێميان كردە ئامانج. بە وتەی رۆژنامەی فيگارۆی فەرانسی ”خەڵكی ئێران ئێستا نەفرەتی قووڵيان لە هەناودايە بەرانبەر بە سەرانی رژێم و بە لايانەوە ئيسڵاح تەڵەب و ئوسولگەر جياوازييان نيە. هەر بۆيە ناڕەزايەتييە جەماوەرييەكانی سەر شەقام، بنەما و رەوايەتی رژێمی مەلاكانی لەق كردووە”. روحانی فريودەرانە بە جورێك قسە دەكات كە گوايا هۆگر و ئەوينداری ئازادييە. لە كاتێكدا لە ماوەی سەرۆكايەتی خۆيدا، زياتر لە (4000) كەس لە سێدارە دراون و لە راپەڕينەكەی ئەمدواييەشدا زۆرێك لە گەنجان خەڵتانی خوێن كراون و نزيكەی (10)هەزار كەسيتريش گيراون و راپێچی زيندانەكانی حكومەت كراون. بێگومان رەوتی راپەڕين هەر دوو باڵی حكومەت رادەماڵێت و توندی و گڕ و تينی شەڕەگورگی ناو دەسەڵاتيش زياد دەكات.

شیاوی وتنە کح مەجليسی ئاخوندانيش لەو بوومەلەرزە سیاسيە بەدەر نيە. دوای دەستپێكی راپەڕينی ئەمجارە، باڵەكانی حكومەت لە ناو مەجليس بەر بوونە گيانی يەكتر. لەم دواييانەدا (محەمەدعەلی بەيرانوەندی )، ئەندامی مەجليسی ئاخوندان لە شاری خوڕمئاواوە وتی: ”ئەگەر هەلی كار بۆ گەنجان نەڕەخسێنین و وڵامی داخوازييەكانيان نەدەينەوە. ئەوا لايەنانيتر هەن كە ئەنگێزەی خەبات و شۆڕش لە هەناوياندا درووست دەكەن”. ترس و تۆقينی رژێم لە هێزی سەرەكيی راپەڕين، واتا ژنان و گەنجانی بوێری ئێران ئەو شتەيە كە هەر دێت و پەرە ئەسەنێت.

پشتيوانيكردنی تاوانبارانی وەك قاسم سليمانی لە هێزی دادوەريی رژێمی مەلاكانیش، كە هەروەك ئيمامانی جومعەی شارەكان لە لايەن شەخسی خامنەئيەوە سەرۆكی بۆ دەستنيشان دەكرێت و سەرەدەزووی زۆرێك لە تاوان و دزی و گەندەڵيی ئەخلاقی و ماڵی بەدەستەوەیە، ئەو راستييە دەردەخات كە كاريگەری راپەڕين، ئەم هێزە سەركوتكەرەيشی تووشی شڵەژان كردووە. بە وتەی ئيمام جومعەی شاری هەمەدان، لەم راپەڕينەدا ”نزيكەی 60 نووسينگەی ئيمام جومعەكان هێرشيان كراوەتە سەر”.

من نازانم بۆمەلەرزەی سياسی بە چی هەڵدەسەنگێدرێت، بەڵام بە باوەڕی من، لەم راپەڕينەی ئێستادا، دەنگی شكاندنی ئێسكەكانی رژێمی ئێران بيسترا!