ئەو خەڵكەی لە وڵاتەکەی خۆیاندا زيندانی کراون!

ئەو خەڵكەی لە وڵاتەکەی خۆیاندا زيندانی کراون!

چاوخشانێك بەسەر دۆخی ژيان لە ئێرانی ژير دەسەڵاتی ئاخونديدا

نووسينی : عەبدولڕەحمان مەهابادی، نووسەر و لێکۆڵەری سیاسی

ماوەیەک لەمەوبەر لەگەڵ هاوڕێيەكمدا باسی درووشمەكانی خەڵكی ئێرانمان دەكرد لە راپەڕينەكەياندا بەرانبەر بە ديكتاتۆر. گفتوگۆكەيكی چر و چر کە نێوانماندا درووست بوو. باسەكە لێرەوە دەستی پێكرد كە درووشمەكان تا چ رادەيەك ئازار و خواستەكانی خەڵكی پێوە ديارە!

درووشمەكان روواڵەتيان ساكار بەڵام هاوكات هەر كامەيان بابەتگەلێكی ئەو وڵاتەن كە دەكرێ بە كتێب بكرێن. لە بارودۆخی ئابووری و سياسی و كۆمەڵايەتييەوە تا كارنامەی 40 ساڵەی ئەو رژێمەی ئێستا بەرەو رووخانە. هەندێك لە درووشمەكان بریتین لەوانە: نە غەززە نە لوبنان گيانم فيدا دەكەم بۆ ئێران. واز لە سوريا بێنە مشووری ئێمە بخۆ. مەرگ بۆ ديكتاتۆر. دوژمن ئێمە لێرەيە، بە درۆ دەڵێن ئەمريكايە. ئيسڵاحخواز و ئوسولگەرا ئيتر تەواو بوو ماجەرا و ....

خەڵكی ئێران برسين. لە كاتێكدا هێڵی هەژاری لە ئێران پێنج مليۆن تمەنە، كرێدەستی مانگانەی كرێكار 2 مليۆن تمەنە. ميدياكانی حكومەت دان بەو راستيەدا دەهێنن كە زياد لە (50) مليۆن ئێرانی لە ژێری هێڵی هەژاريدان. نرخی «قڕان» و «دۆڵار» بە دوو لای پێچەوانەدا بە خێرايی لێك دوور دەکەونەوە كە واتاكەی، دووركەوتنەوەی زياتری چينی دەوڵەمەندان و هەژارانە. لە لايەك سەران و كاربەدەستان و خزم و كەس و لايەنگرانی ئەم رژێمە كە وەك ميدياكان حكومەت خۆيان باسی دەكەن لە چەند سەد كەس تێناپەڕێت. لە لايەكيترەوە جەماوەری خەڵكی ئێران كە زۆرينەی رەهان لە كۆمەڵدا. لە ئێران زۆر كەس هەن سپێردراوەكانی خۆيان له لايەن بۆندەكانی سەر بە حكومەتەوە بە تاڵان براوە و ناڕەزاييەتيەكانيان بۆ وەرگرتنەوەی داراييەكانيان بە جێيەك نەگەيشتووە. بۆندەكانی سەر بەو رژێمه بە شێوازی جياجيا پارەی ئەو خەڵكەيان خواردووە. گرانی لەوپەڕی خۆيدايە و رێژەی بێكاربووان هەر دێت و زياد دەبێت. دۆخی ژيانی خەڵك لێكترازاوە و دياردەی مەترسيداری وەك كۆڵبەری، ئيعتياد، لەشفرۆشی، فرۆشتنی ئەندام جەستە و تەنانەت فرۆشتنی مناڵان تاروپۆی كۆمەڵی تەنيوەتەوە. ئێش و ئازارەكانی ئەو خەڵكە بە روخساريانەوە ديارە و هەر تاكێكی ئێران كە ببينێـت گوێبستی قسەكانيان دەبیت دەستبەجێ ئازارەكانی خۆی هەڵدەڕێژێتە سەر سفرەت و بيستەر والێدەكات بير لەوە بكاتەوە كە بە راستی لەبەرچی؟

خەڵكی ئێران بێ ئاسايش و نائاسودەن. هەر تاكێك ياخود هەر خانەوادەيەك لە لايەن دەيان ئۆرگانی حكومەتەوە بە خەستی چاودێری دەكرێت. كەم كەس هەيە لە ئێران كە لە ژێر ئەو چاودێريكردن و گوشارانەدا نەبێت. هەر لە بەر ئەوەيە كە ئێران لە روانگەی ئێرانيەكان و تەنانەت گەلانی جيهانەوە بۆتە زيندانێكی گەورە كە تيايدا زيندانی رۆژانە لە ژێر ئەشكەنجەی رۆحی و جەستەييدايە. تا ئێستا زياد لە (120)هەزار كەس لە سێدارە دراون. ئەگەر ئيعدامی زيندانيانی عادی كە خۆيان قوربانيی دەستی ئەم رژێمەن ئەژمار بكەين ئاماری لە سێدارەدراوان لە ماوەی چوار دەيە دەسەڵاتی ئاخوندان چەند هێندەيە. زيندانيانی سياسی تەنها بە هۆی نەياربوونيان بەرانبەر بە رژێم بە لێشاو لە سێدارە دەدرێن. بەڵگەگەلێكی زۆر هەن نيشان دەدەن ژمارێكی زۆر لە زيندانيانی سياسی لە ژێر ناوی زيندانيانی عادی لە سێدارە دراون! بە پێی راگەياندنی ناوەندە جيهانييەكانی تايبەت بە پێشێلكردنی مافەكانی مرۆڤ، ئێران ريكۆردداری ئيعدامە لە جيهاندا و هەروەها ريكۆردداری گرتن و زيندانيكردنی هونەرمەندان و بە تايبەت رۆژنامەنووسانە له جيهاندا. كاتێ سەيری خانەوادەيەكی ئێرانی دەكەيت ئەبينيت كە روانینەکانیان بە گشتی واتادار و گران و مەڕموزن. لێرەشدا بيسەر و بينەر وای لێدێت كە ئەم پرسيارە لە خۆی بكات كە بە راستی لەبەرچی؟

خەڵكی ئێران تووڕەن لە دەسەڵات. لە كاتێكدا وڵاتەكەيان دەوڵەمەندە و خەڵكەكەی شياوی ژيانێكی باشترن بەڵام بە هۆی رژێمی ديكتاتۆرييەتی ئايينيی دەسەڵاتدارەوە ئەم سەروەت و سامانەيان خەرجی توندڕۆيی و بناژۆخوازی و تيرۆر و كوشتاری نەيارانی رژێم و بەرهەمهێنانی چەكی ناوكی و فرەخوازيی ئاخوندەكان دەكرێت. بەشی هەرە زۆری ئابووری وڵاتەكەيان بە دەست سوپای پاسدارانەوەيە كە ئامێری ئەم سەركوتكردن و هەناردەكردنی تيرۆر و توندرۆييەیە. ئەوان بۆ بۆ بەديهێنانی ئامانجەكانيان دەيان و سەدان حيزب و رێكخراو و گروپی تيرۆريستیان لە وڵاتانيتر و لە رووی ماڵييەوە دابين كردووە تا بتوانن خۆيان لە ناو ئێران لە سەر كار بمێننەوە. ئەم رژێمە بۆ لە سەرپێ مانەوەی خۆی، زياد لە لايەنگرانی لە ناو ئێران، پشتی بە هێزە تيروريستييەكان و كرێگرەكانی لە دەرەوەی سنوورەكان بەستووە. بە تايبەت كە ئێستا بە هۆی راپەڕينی جەماوەرەوە، لايەنگرانی ئەم رژێمه لە هەڵوەرين و دووركەوتنەوەن لە حكومەت. ئەگەر ئەبينين كە رژێمی ئاخوندان پشتيوانيی ماڵی دەكات لە ديكتاتۆری سوريا يا حيزبوڵڵا لە لوبنان و ميليشيا و حيزبە شيعيەكان لە عێراق يا حوسييەكان لە يەمەن و ساڵانە سەدان مليۆن دۆڵار لە داراييەكانی خەڵكی ئێرانيان بۆ تەرخان دەكات تەنها هۆيەكەی هەر ئەوەمە كە باسم كرد. ئێستا گەلانی جيهان بە چاوی خۆيان ئەبينن كە رژێمی مەلاكان لە ئێران بێ پێگەی كۆمەڵايەتی و جەماوەرييه و ئەگەر هەڵبژاردنێكی ئازاد و ديموكراتی هەبێت، بێگومان زياد لە سەددا 95ی خەڵك دەنگی «نا» بۆ ئەم رژێمە دووپات دەكەنەوە. ئاخوندان خۆيان باش هەست بەوە دەكەن و نايشارنەوە و مەترسيی رووخاندنی رژێمەكەيان زۆر بە لاوە «جيددی»ە.

لێرەدايە كە وڵامی پرسيارەكانی خۆت وەردەگريتەوە و هەست بە هاودەنگی دەكەيت لەگەڵ خەڵكی ئەو وڵاتە و مافی راپەڕينيان لات درووست دەبێت. ئێستا دوای تێپەڕبوونی نزيك بە چوار دەيە لە دەسەڵاتی مەلاكان، خەڵك بە ئاگان دەربارەی پێناسە و ناوەرۆك و مەرامی دژە مرۆيی ئاخوندان و کاری بە تاڵانبەرانەیان لە ژێر ناوی ئيسلام و قوڕئان. ئەوان بەو راستييە گەيشتوون كە ژێدەر و سەرچاوەی هەموو كێشەكانی ناو كۆمەڵ، ئاخوندانی دەسەڵاتداران و هەر بۆيە دژ بە ديكتاتۆرييەتی ئايينيی دەسەڵاتدار راپەڕيون. ئەوان تا سەر ئێسك و لە ناخی دڵيانەوە هەستيان بە هەژاری و كارەساتەكانيتری ناو كۆمەڵ كردووە. ئێستا ئەوان ژيانی پڕ لە خۆشگوزەرانيی سەرانی رژێم و بێچووەكانيان و خزم و كەسی ئەوان لە ناو ئێران ياخود دەرەۆەی ئێران دەبينن. ئەوان ئەم تێگەيشتن و شارەزايی و ئاگاداربوونەيان لە درووشم و داواكارييەكانيان لە رەوتی راپەڕين دەرخستووە. درووشمەكانی راپەڕين هەڵقوڵاوی ناو جەماوەر و دڵ و دەروونی تاكی ئێرانيدايە كه ئێستا بڕياريان داوە ديكتاتۆر راماڵن و ئايندەيەكی روون و گەش بۆ خۆيان و گەلانی ناوچەكە دەستەبەر بكەن. ئەوان بە باشی ئەوە دەزانن كە بە تەنها نين و پشتيان بۆ موقاومەتێك گەرمە كە لە ناو خەڵكدا خاوەنی «ناوەندەكانی شۆڕش»ن كە هەم رێنوێنييان دەكات و هەميش ئامادەيان دەكات لە پێناو نزيكبوونەوە بە كاتی رووخاندنی رژێم.

هەندێك كەس و لايەن بە درووستی راپەڕينی خەڵكی ئێرانيان بە «شۆڕشی برسييەكان» و «رووخێنەرانی رژێمی ئايينی» ناوزەد كردووە تا بڕينەكانی خەڵكی برسی سارێژ بكەن و كۆتايی بهێنن بە دەسەڵاتی دينفرۆشان و فەتوا فرۆشانی ملياردێر لە ئێران.

Abdorrahman.m@gmail.com